İranın müvəqqəti işlər vəkili Fransa XİN-ə çağırılıb

İranın Fransadakı müvəqqəti işlər vəkili iyulun 19-da Tehranda iki fransız diplomata qarşı baş vermiş insidentlə bağlı Fransa Xarici İşlər Nazirliyinə çağırılıb. Bu barədə BFMTV telekanalı məlumat yayıb.

Fransa XİN bildirib ki, görüş zamanı insident qəti şəkildə pislənib.

"Fransa İran hakimiyyətinin hadisəyə aydınlıq gətirəcəyini, təqsirkarları məsuliyyətə cəlb edəcəyini və beynəlxalq öhdəliklərinə uyğun olaraq diplomatik nümayəndəliklərin və əməkdaşlarının təhlükəsizliyini təmin edəcəyini gözləyir", – bəyanatda deyilir.

Bundan əvvəl Fransanın xarici işlər naziri Jan-Noel Barro insident barədə iranlı həmkarı Abbas Əraqçi ilə danışdığını bildirmişdi.