SEPAH Hörmüz boğazı ilə bağlı xəbərdarlıq edib

İran Silahlı Qüvvələrinin tərkibinə daxil olan İslam İnqilabı Keşikçiləri Korpusunun (SEPAH) nümayəndəsi Hüseyn Möhibi gəmiçilik şirkətlərini Hörmüz boğazının cənub marşrutundan istifadə etməməyə çağırıb. O, həmin ərazidə suların minalandığını iddia edib.

Möhibi "X" sosial şəbəkəsində paylaşımında bildirib ki, cənub marşrutu təhlükəlidir və bu istiqamətdə hərəkət edən gəmilər risk altındadır.

Bu arada, "Xatəm əl-Ənbiya" Hərbi Komandanlığı açıqlamasında Hörmüz boğazının bağlı qaldığını, lakin istisna hallarda bəzi gəmilərin Tehranın əvvəlcədən müəyyən etdiyi marşrutlar və qaydalar əsasında boğazdan keçməsinə icazə verilə biləcəyini bildirib.

Açıqlamada deyilir ki, boğazdan keçidə icazə veriləcəyi təqdirdə, bu yalnız əvvəlcədən müəyyən edilmiş marşrut üzrə və elan olunmuş prosedurlara uyğun həyata keçiriləcək.

Hörmüz boğazı qlobal enerji tədarükü üçün əsas dəniz keçidlərindən biri hesab olunur və burada təhlükəsizliklə bağlı gərginlik dünya neft və qaz bazarlarına təsir göstərə bilər.