Pakistanda terror aktı nəticəsində 15 nəfər həlak olub

Pakistanın Xayber-Paxtunxva əyalətinin Tank şəhərində təhlükəsizlik blokpostuna edilən hücum nəticəsində 15 nəfər həlak olub. Ölənlərdən 14-ü təhlükəsizlik qüvvələrinin əməkdaşıdır. Bu barədə Pakistan ordusunun mətbuat xidməti məlumat yayıb.

Məlumata görə, hücum cümə günü səhər saatlarında baş verib. Ordu hücuma görə "Fitnə əl-Xəvaric" adlandırdığı, "Təhrik-i-Taliban Pakistan" (TTP) kimi tanınan silahlı qruplaşmanı məsuliyyət daşımaqda ittiham edib.

Bəyanatda bildirilir ki, hücumçular blokpostun müdafiəsini yarmağa cəhd göstərsələr də, təhlükəsizlik qüvvələri onların irəliləməsinin qarşısını alıb. Partlayış nəticəsində infrastruktur ciddi zərər görüb.

Hadisə nəticəsində 12 hərbçi, iki polis əməkdaşı və bir dövlət qulluqçusu həlak olub. Qarşıdurma zamanı 12 silahlı zərərsizləşdirilib.