İspaniyada meşə yanğınlarına görə 70 mindən çox insan təxliyə edilib

İspaniyanın mərkəzi bölgələrində davam edən meşə yanğınları səbəbindən təxliyə olunanların sayı 70 mini keçib. Təkcə son sutka ərzində daha 25 min nəfər evini tərk etmək məcburiyyətində qalıb.

"The Guardian" nəşri xəbər verir ki, bu barədə İspaniya hökumətinin nümayəndəsi Fransisko Martin məlumat yayıb.

Onun sözlərinə görə, 20 mindən çox sakinə isə evlərini tərk etməmək tapşırılıb. Hazırda xəsarət alanlar barədə məlumat yoxdur.

İspaniya Daxili İşlər Nazirliyinin məlumatına əsasən, təxliyə edilənlərin əksəriyyəti Madrid ətrafındakı yaşayış məntəqələrində və Avila vilayətində yaşayır. Bölgədə milli səviyyəli fövqəladə vəziyyət elan olunub.

Qonşu Fransada iyunun əvvəlindən anomal istilər səbəbindən meşə yanğınları başlayıb. İyulun ortalarında oxşar vəziyyət İspaniyada da yaranıb. Hər iki ölkədə ümumilikdə 260 mindən çox insan təxliyə edilib. İspaniyanın AEMET meteorologiya agentliyi yanğın təhlükəsinin ölkə ərazisinin böyük hissəsində və Balear adalarında da yüksək olaraq qaldığını bildirib.