Azərbaycanda bir həftədə 661 mina və partlayıcı sursat zərərsizləşdirilib

Azərbaycanın işğaldan azad edilmiş ərazilərində avqustun 17-dən 23-dək aparılan minatəmizləmə əməliyyatları zamanı 41 tank əleyhinə mina, 98 piyada əleyhinə mina və 522 digər partlayıcı hərbi sursat aşkarlanaraq zərərsizləşdirilib.

Azərbaycan Minatəmizləmə Agentliyinin (ANAMA) həftəlik hesabatına əsasən, hesabat dövründə ümumilikdə 1 829,3 hektar ərazi minalardan təmizlənib.

Minatəmizləmə işləri Tərtər, Ağdərə, Kəlbəcər, Ağdam, Xocalı, Xankəndi, Şuşa, Xocavənd, Laçın, Füzuli, Cəbrayıl, Qubadlı və Zəngilan rayonlarında, həmçinin Qazax rayonunun işğaldan azad edilmiş Bağanıs Ayrım, Aşağı Əskipara, Xeyrımlı və Qızılhacılı kəndlərində həyata keçirilib.

Əməliyyatlarda ANAMA, Müdafiə Nazirliyi, Fövqəladə Hallar Nazirliyi, beş yerli təşkilat və bir qeyri-hökumət təşkilatı iştirak edib.

Azərbaycan işğaldan azad edilmiş ərazilərin minalardan təmizlənməsini bərpa və yenidənqurma prosesinin əsas istiqamətlərindən biri hesab edir. Rəsmi statistikaya görə, ölkədə mina və partlayıcı sursatların qurbanlarının sayı 3 400 nəfəri ötüb. Onlardan 359-u uşaq, 38-i qadındır.

2020-ci ildə başa çatan İkinci Qarabağ müharibəsindən sonra mina partlayışları nəticəsində 382 nəfər zərər çəkib. Onlardan 55 nəfər həlak olub, 143 nəfəri isə mülki şəxslərdir.

Gülnar Nazimqızı