Zorakılıq iddiası ilə bağlı uşaqdan fərqli açıqlama: Skuterdən yıxılmışam - yenilənib

Sosial şəbəkələrdə azyaşlının ögey anası tərəfindən zorakılığa məruz qalması ilə bağlı yayılan məlumat aidiyyəti qurumlar tərəfindən araşdırılıb. Bu barədə Ailə,Qadın və Uşaq Problemləri üzrə Dövlət Komitəsindən bildirilib. 

Araşdırma çərçivəsində qurumların nümayəndələri tərəfindən uşaq və ailə ilə görüş keçirilib, məsələ ilə bağlı ətraflı söhbət aparılıb.

Uşağın dizində və əlində müşahidə olunan sıyrıqların yaranma səbəbi ilə bağlı verilən suala azyaşlı skuterlə hərəkət edərkən yıxıldığını bildirib.

Bununla belə, uşağın zorakılığa məruz qalıb-qalmamasının dəqiq müəyyənləşdirilməsi məqsədilə onun tibbi ekspertizaya göndərilməsi də qərara alınıb.

Məsələ aidiyyəti qurumların nəzarətindədir.

12:06

Bakıda 9 yaşlı uşağın ögey anası tərəfindən zorakılığa məruz qalması ilə bağlı aidiyyəti qurumlara müraciət olunub.

Sosial şəbəkələrdə yayılan məlumatda 9 yaşlı M.Ə-nın ögey anası tərəfindən döyüldüyü, uşağın bədənində xəsarət və göyərmələrin olduğu, həmçinin saçının dibdən kəsildiyi iddia edilir.

Məsələ ilə bağlı Ailə, Qadın və Uşaq Problemləri üzrə Dövlət Komitəsi Anews.az-a açıqlama verib.

Komitədən bildirilib ki, faktla bağlı Daxili İşlər Nazirliyinə və Nizami Rayon İcra Hakimiyyətinə rəsmi müraciət olunub.

“Məsələnin aidiyyəti qurumlar tərəfindən araşdırılması və uşağın hüquq və mənafelərinin, eləcə də təhlükəsizliyinin təmin edilməsi istiqamətində bütün zəruri tədbirlər görülür”, - Komitədən qeyd edilib.

Gülnar Nazimqızı