Azərbaycanda ali məktəblərin qəbul planı 97,07% dolub

Bu il Azərbaycanda ali təhsil müəssisələrinin qəbul planının 97,07 faizi dolub. 

Dövlət İmtahan Mərkəzinin (DİM) İdarə Heyətinin sədri Məleykə Abbaszadə bildirib ki, ali təhsil müəssisələrinə qəbul olmaq üçün müsabiqədə 87 146 nəfər iştirak edib.

Onun sözlərinə görə, onların 58 947 nəfəri, o cümlədən 4 215 subbakalavr tələbə adını qazanıb. Qəbul olunanlardan 28 108 nəfər dövlət sifarişi, 317 nəfər dövlət hesabına, 30 522 nəfər isə ödənişli əsaslarla təhsil almaq hüququ əldə edib.

Abbaszadə bildirib ki, boş qalan plan yerlərinə ixtisas seçimi başa çatdıqdan sonra qəbul planının dolma göstəricisi daha da yüksələcək.

Ötən illə müqayisədə bu il ali məktəblərə qəbul olunanların sayı 1 711 nəfər artıb. Dövlət sifarişi əsasında qəbul olunanların sayı isə əvvəlki ilin göstəricisindən 290 nəfər çoxdur.

DİM sədrinin sözlərinə görə, son illərdə qəbul planında dövlət sifarişli yerlərin sayının artırılması ödənişsiz təhsil imkanından yararlanan tələbələrin sayının da artmasına səbəb olur.