2026-cı ilin son tutulma hadisəsi avqustun 28-də baş verəcək

2026-cı ilin son tutulma hadisəsi avqustun 28-də baş verəcək və qismən Ay tutulması olacaq. Azərbaycanda tutulmanın yalnız başlanğıc mərhələsini müşahidə etmək mümkün olacaq. Bu barədə N.Tusi adına Şamaxı Astrofizika Rəsədxanasından məlumat verilib.

Tutulma saat 05:23-də başlayacaq və 11:01-də başa çatacaq. Hadisə Avropa, Afrika, Şimali və Cənubi Amerika, Sakit, Atlantik və Hind okeanlarında müşahidə olunacaq.

Azərbaycanda saat 05:35-də artıq mülki alaqaranlıq başlayacaq. Ay həmin vaxt üfüqdən yuxarıda olsa da, tutulmanın başlamasından cəmi 12 dəqiqə sonra havanın işıqlanması müşahidəni çətinləşdirəcək. Bu müddət tutulmanın yarımkölgəli fazasına təsadüf edəcək.

Yarımkölgəli Ay tutulması adi gözlə çətin müşahidə olunur və Ayın işığının cüzi azalması ilə özünü göstərir.

Qismən Ay tutulması Yerin kölgəsinin Ayı tam örtmaması zamanı baş verir. Ay tutulması yalnız tam Ay fazasında mümkündür. Ayın orbit müstəvisi Yerin orbit müstəvisinə təxminən 5 dərəcə bucaq altında yerləşdiyindən belə tutulmalar hər ay baş vermir.

2026-cı ildə bundan əvvəl iki Günəş və bir Ay tutulması baş verib. Rəsədxananın məlumatına görə, onların heç biri Azərbaycan ərazisindən müşahidə olunmayıb.

2027-ci ildə isə iki Günəş və üç Ay tutulması olmaqla, ümumilikdə beş tutulma hadisəsi baş verəcək. Onlardan fevralın 21-dəki yarımkölgəli Ay tutulması və avqustun 2-dəki tam Günəş tutulması Azərbaycandan müşahidə ediləcək. Avqustun 2-dəki Günəş tutulması Azərbaycan ərazisindən qismən Günəş tutulması kimi görünəcək.