FHN qeyri-sabit hava şəraiti ilə bağlı əhaliyə xəbərdarlıq edib

Fövqəladə Hallar Nazirliyi (FHN) ölkə ərazisində müşahidə olunan qeyri-sabit hava şəraiti ilə bağlı əhaliyə xəbərdarlıq edib.

FHN-in məlumatına görə, ayrı-ayrı yerlərdə intensiv yağış yağır, arabir güclənən külək əsir və şimşək çaxır. Belə hava şəraitinin sabahadək davam edəcəyi proqnozlaşdırılır.

Nazirlik intensiv yağıntılar zamanı bəzi çaylarda mümkün sel və daşqınlardan, eləcə də subasmadan qorunmaq üçün təhlükəli ərazilərdən uzaq durmağı tövsiyə edib.

FHN təhlükə yarandıqda dərhal yaxınlıqdakı yüksəkliyə qalxmağı və xilasedicilərin çağırış və tövsiyələrinə əməl etməyi bildirib.

Güclü külək zamanı yüngül konstruksiyalı və müvəqqəti tikililərdən, bina və reklam lövhələrindən, elektrik dirəkləri və naqillərindən, habelə hündür ağaclardan uzaq durmaq tövsiyə olunub.

Kiçikhəcmli gəmi istifadəçilərinə isə belə hava şəraitində dənizə çıxmamaq çağırışı edilib.

FHN həmçinin ildırım çaxarkən elektrik cihazlarını şəbəkədən ayırmağı, telefonla danışmamağı, elektrik xətləri, ildırımötürücülər, navalçalar və antenalardan uzaq durmağı tövsiyə edib. Açıq havada hündür ağacların altında daldalanmaqdan çəkinmək, avtomobildə olarkən isə hərəkəti dayandıraraq şüşələri qaldırmaq məsləhət görülüb.