Azərbaycan 2030-cu ilədək buğda və arpa üzrə toxum təminatını 100%-ə çatdırmağı hədəfləyir

Azərbaycan 2030-cu ilədək buğda və arpa üzrə yerli toxum təminatını 100%-ə çatdırmağı planlaşdırır. Bunu Aqrar Xidmətlər Agentliyinin sədr müavini Taleh Zeynalov bazar ertəsi bildirib.

“Hazırda ölkədə yerli toxum təminatı səviyyəsi 54%-dir. Bu, çox aşağı göstəricidir”, - Zeynalov mətbuat konfransında deyib.

Onun sözlərinə görə, Prezident İlham Əliyevin təsdiqlədiyi 2026-2030-cu illər üzrə dövlət proqramı çərçivəsində qarşıdakı beş ildə, ilk növbədə, buğda və arpa üzrə toxum təminatının 100%-ə çatdırılması hədəflənir.
“Həmin hədəfə çatmaq üçün nəzərdə tutulan fəaliyyətlərin hamısını icra etməliyik”, - Zeynalov bildirib.

Prezident İlham Əliyev mayın 25-də 2026-2030-cu illərdə kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair Dövlət Proqramını təsdiqləyib.


İyulda qəbul edilən yeni “Toxumçuluq haqqında” qanun isə toxum istehsalı, dövriyyəsi, sertifikatlaşdırılması və keyfiyyətinə nəzarətin yeni hüquqi mexanizmlərini müəyyən edir.

Gülnar Nazimqızı