Komitə bağçada uşağın qanında psixotrop maddə aşkarlanması ilə bağlı DİN və Baş Prokurorluğa müraciət edib

Ailə, Qadın və Uşaq Problemləri üzrə Dövlət Komitəsi Bakının Yasamal rayonunda yerləşən 98 saylı uşaq bağçasında təlim-tərbiyə alan uşağın qanında psixotrop maddə aşkarlanması iddiası ilə bağlı Daxili İşlər Nazirliyinə (DİN) və Baş Prokurorluğa müraciət edib.Bu barədə Dövlət Komitəsindən bildirilib.

Komitənin məlumatına görə, azyaşlının səhhətində və davranışında mənfi dəyişikliklərin müşahidə edilməsi, həmçinin tibbi müayinələr zamanı orqanizmində sağlamlığına mənfi təsir göstərə biləcək maddələrin aşkarlanması barədə yayılan məlumatlar nəzarətə götürülüb.

Bildirilib ki, azyaşlının valideynləri Dövlət Komitəsinə dəvət olunub və onlardan məsələ ilə bağlı ətraflı məlumat alınıb.

"Faktın bütün təfərrüatları ilə birlikdə obyektiv və hərtərəfli araşdırılması, eləcə də azyaşlının hüquq və mənafelərinin qorunmasının təmin edilməsi məqsədilə Dövlət Komitəsi tərəfindən Daxili İşlər Nazirliyinə və Baş Prokurorluğa rəsmi müraciətlər ünvanlanıb", - məlumatda deyilir.

Hazırda aidiyyəti dövlət qurumları tərəfindən araşdırma aparılır.

Komitə qeyd edib ki, araşdırmanın nəticələrinə uyğun olaraq qanunvericiliyin tələblərinə əsasən müvafiq tədbirlər görüləcək.