Əmrullayev: regionlarda zəif nəticələrin əsas səbəblərindən biri ibtidai və məktəbəqədər təhsildir

Azərbaycanın bəzi regionlarında şagirdlərin aşağı nəticə göstərməsinin əsas səbəbləri məktəbəqədər təhsilin əhatə səviyyəsinin aşağı olması, ibtidai təhsilin zəifliyi və kiçik kənd məktəblərində keyfiyyət problemidir. Bunu elm və təhsil naziri Emin Əmrullayev bildirib.

“Bizim həqiqətən də bir çox bölgələrimizdə ibtidai təhsilin vəziyyəti zəifdir. İbtidai təhsil zəifdirsə, onun üzərində heç nə qura bilməyəcəksiniz”, - Əmrullayev PISA nəticələrinin təqdimatı zamanı deyib.

Onun sözlərinə görə, aşağı göstəricilərin qeydə alındığı regionlarda məktəbəqədər təhsilin əhatə dairəsi də məhduddur.

“Harada məktəbəqədər təhsilin əhatəsi aşağıdırsa, orada nəticələr də aşağı olur. Məktəbəqədər təhsil imkanlarının daha geniş olduğu ərazilərdə isə eyni təhsil sistemi daxilində daha yüksək nəticələr görürük”, - nazir bildirib.
Əmrullayev kiçik kəndlərdə azsaylı siniflərdə tədrisin təşkilini də keyfiyyətə mənfi təsir göstərən amillərdən biri kimi göstərib.

Onun sözlərinə görə, iki-beş şagirdin təhsil aldığı siniflərdə keyfiyyətli tədrisin təşkili çətinləşir.

Nazir bildirib ki, valideynlərin, xüsusilə anaların təhsil səviyyəsi də şagirdlərin nəticələrinə təsir edə bilər. Ayrı-ayrı amillərin nəticələrə təsir dərəcəsinin gələcəkdə ayrıca ölçülməsi planlaşdırılır.

Əmrullayev PISA ballarındakı artımın qiymətləndirilməsində başlanğıc səviyyənin nəzərə alınmalı olduğunu deyib.

Onun sözlərinə görə, 300 baldan başlayan ölkə və ya region üçün 30-35 ballıq artıma nail olmaq 400 baldan yuxarı nəticəni artırmaqla müqayisədə daha asandır.

Nazir COVID-19 pandemiyasının təhsilə mənfi təsir göstərdiyini, lakin dünyada nəticələrin uzunmüddətli azalmasını yalnız pandemiya ilə izah etməyin düzgün olmadığını bildirib.
Onun sözlərinə görə, məktəbəqədər və ibtidai təhsildə hazırda görülən işlərin nəticələrinin qısa müddətdə görünməsi gözlənilmir.

“Bu, tez olmayacaq. Təxminən 10 ildən sonra nəticələri görəcəyik. 2029-2030-cu illər üçün daha yaxşı göstəricilərə ümid edirik”, - Əmrullayev deyib.

Gülnar Nazimqızı