Saxta tibbi sənədlərlə müavinət alınmasına görə iki həkimin işi məhkəməyə göndərilib

Baş Prokurorluq rüşvət müqabilində saxta tibbi sənədlər vermək və bu sənədlər əsasında müavinətlərin ödənilməsini təşkil etməkdə ittiham olunan iki həkim barəsində cinayət işini məhkəməyə göndərib.

Qurumun məlumatına görə, “General Hospital” klinikasının baş həkimi Rüstəm Mikayılov və Bakıdakı 42 nömrəli şəhər poliklinikasının keçmiş sahə həkimi Səmayə Əşrəfova 2017-2024-cü illərdə müraciət edən şəxsləri müayinədən keçirmədən onların əmək qabiliyyətini müvəqqəti itirməsi barədə tibbi sənədlər vermək müqabilində müxtəlif məbləğlərdə rüşvət almaqda ittiham olunurlar.

İstintaq hesab edir ki, həmin sənədlər əsasında müavinətlərin ödənilməsi təşkil edilib. Mikayılova, həmçinin rüşvətdən əldə etdiyi vəsaiti leqallaşdırma ittihamı irəli sürülüb.

Təqsirləndirilən şəxslər barəsində polis nəzarətinə vermə qətimkan tədbiri seçilib, Mikayılova məxsus əmlak üzərinə həbs qoyulub. “Seymur-M” MMC barəsində də cinayət-hüquqi tədbirlərin tətbiqi üzrə icraat başlanıb.

İş baxılması üçün Bakı Ağır Cinayətlər Məhkəməsinə göndərilib. Hadisədə iştirak etməkdə şübhəli bilinən digər şəxslərlə bağlı istintaq davam edir.

Təqsirləndirilən şəxslərin ittihamlara münasibəti açıqlanmayıb.