Azərbaycana daxil olan pul baratlarının həcmi 40% artıb

Bunu Azərbaycan Mərkəzi Bankının Statistika departamentinin direktoru Samir Nəsirov bildirib.

Onun sözlərinə görə, hesabat dövründə təkrar gəlirlər balansında 525 milyon dollarlıq profisit yaranıb. Bu profisiti şərtləndirən əsas amil pul baratları olub.

“Bu dövrdə ölkəyə xalis olaraq pul baratlarının daxil olması 540 milyon dollar təşkil edib. Ölkəyə daxil olan pul baratlarının həcmi 748 milyon dollar, ölkədən çıxan pul baratlarının həcmi isə 207 milyon dollar olub”, - deyə S.Nəsirov qeyd edib.

O bildirib ki, ötən ilin müvafiq dövrü ilə müqayisədə ölkəyə daxil olan pul baratlarının həcmi 40% artıb, ölkədən çıxan pul baratları isə təxminən 13% azalıb.

S.Nəsirovun sözlərinə görə, ölkəyə daxil olan pul baratlarının əsas mənbələri Rusiya, Türkiyə, ABŞ, İngiltərə və Gürcüstandır.

Ölkədən pul baratlarının köçürüldüyü əsas 5 ölkə isə Türkiyə, ABŞ, Rusiya, Gürcüstan və digər ölkələr olub.

Mərkəzi Bank rəsmisi əlavə edib ki, cari əməliyyatlar balansının kəsirli maddələri sırasında xidmətlər və ilkin gəlirlər balansı da yer alıb.

“Xidmətlər balansında bu dövrdə təxminən 1 milyard dollarlıq kəsir yaranıb. Bu kəsirin əsas səbəbi digər biznes xidmətləri və neft-qaz sektorunda göstərilən tikinti xidmətləri ilə bağlıdır”, - deyə o bildirib.

Aytac