İlkin gəlirlər balansının kəsiri 16% azalıb

2026-cı ilin ilk 6 ayında Azərbaycanın ilkin gəlirlər balansında 908 milyon dollarlıq kəsir yaranıb.

Bunu Azərbaycan Mərkəzi Bankının Statistika departamentinin direktoru Samir Nəsirov bildirib.

Onun sözlərinə görə, ilkin gəlirlər balansının kəsiri ötən ilin müvafiq dövrü ilə müqayisədə 16% azalıb.

Nəsirov qeyd edib ki, ilkin gəlirlər balansında əsasən faiz repatriasiyası və faiz gəlirləri nəzərə alınır. Neft və qazın qiymətlərinin artması faiz repatriasiyasının da yüksəlməsinə səbəb olur.

“Bu dövrdə birbaşa investisiya portfelindən ölkə xaricinə çıxan faiz repatriasiyası xalis olaraq 1,4 milyard dollar kəsirlə formalaşıb”, - o bildirib.

Mərkəzi Bank rəsmisi bildirib ki, ilkin gəlirlər balansında qiymətli kağızlar portfelindən əldə olunan faiz gəlirləri profisit yaradıb.

Onun sözlərinə görə, hesabat dövründə qiymətli kağızlar portfelindən xalis olaraq 606 milyon dollarlıq profisit formalaşıb. Bu, ölkə xaricində qiymətli kağızlara yatırılmış portfel investisiyalarından əldə olunan xalis faiz gəliridir.

Nəsirov bildirib ki, 2026-cı ilin ilk 6 ayında cari əməliyyatlar balansının profisiti ötən ilin eyni dövrü ilə müqayisədə 2 dəfə artaraq 4,7 milyard dollar təşkil edib.

“Bu profisiti şərtləndirən əsas amil xalis ticarət balansı və təkrar gəlirlər balansı olub”, - o qeyd edib.

Aytac