Əmiraslanov: Ambulator xəstələrin dərman təminatının tibbi sığortaya daxil edilməsi gözlənilir

Azərbaycanda ambulator müalicə alan xəstələrin dərmanla təminatının icbari tibbi sığorta hesabına qarşılanması gözlənilir.

Bunu Milli Məclisin Səhiyyə komitəsinin sədri Əhliman Əmiraslanov bildirib.

Onun sözlərinə görə, icbari tibbi sığorta əhali arasında geniş yayılan xəstəliklər də daxil olmaqla bütün xəstəlikləri əhatə etməlidir.

“Bütün patologiyalar qarşılanmadıqda əhali arasında narazılıq yaranır. Əminəm ki, bu istiqamətdə yeni islahatlar aparılacaq və xüsusilə əhali arasında geniş yayılan xəstəliklər xidmətlər zərfinə daxil ediləcək”, - Əmiraslanov deyib.

O bildirib ki, hazırda icbari tibbi sığorta ilə əhatə olunmayan bəzi dövlət səhiyyə proqramlarının da sığorta hesabına maliyyələşdirilməsi mümkün olmalıdır.

Komitə sədri ilkin tibbi yardımın hazırkı səviyyəsinin qənaətbəxş olmadığını, xüsusilə bölgələrdə bu sahədə problemlərin qaldığını da qeyd edib.


Gülnar Nazimqızı