Azərbaycanda fermerlərin maliyyələşməsi üçün yeni qiymətli kağız növü yaradılır

Azərbaycanda kənd təsərrüfatı istehsalçılarının məhsul istehsalı və ilkin emalı üçün maliyyə cəlb etməsinə imkan verəcək “məhsul şəhadətnaməsi” adlı yeni qiymətli kağızın tətbiqi planlaşdırılır.

Milli Məclisə təqdim edilən qanun layihəsinə əsasən, məhsul şəhadətnaməsi borclunun elektron qaydada buraxdığı təminatlı qiymətli kağız olacaq. Sənəd borclunun müəyyən edilmiş tarixdə kənd təsərrüfatı məhsulunu və ya müvafiq pul məbləğini qiymətli kağızın sahibinə vermək öhdəliyini təsdiqləyəcək.

Yeni mexanizmin fermer və aqrar şirkətlərə gələcək məhsulu təminat kimi göstərməklə əvvəlcədən maliyyə cəlb etmək imkanı yaratması nəzərdə tutulur.

Məhsul şəhadətnaməsinin buraxılışı, dövlət qeydiyyatı və dövriyyəsi ayrıca qanun və digər normativ aktlarla tənzimlənəcək. Sənəd Mülki Məcəllədə istiqraz, səhm, veksel, girov kağızı və daşınmaz əmlak sertifikatı ilə yanaşı qiymətli kağız növü kimi tanınacaq.

Layihəyə görə, məhsul şəhadətnaməsi üzrə hüquqların ötürülməsi Mülki Məcəllə və hazırlanmaqda olan “Məhsul şəhadətnaməsi haqqında” qanuna uyğun həyata keçiriləcək.
Məhsul şəhadətnaməsi üzrə öhdəliyin yerinə yetirilməməsi halında sənədə edilən xüsusi qeyd icra sənədi sayılacaq və dərhal icraya yönəldiləcək.

Bununla bağlı Mülki Məcəlləyə və “İcra haqqında” qanuna dəyişikliklər təklif olunur. Məhsul şəhadətnaməsi Mərkəzi Bankın dövlət qeydiyyatına aldığı qiymətli kağızların reyestrindən istisna ediləcək və onun üçün ayrıca qeydiyyat rejimi tətbiq olunacaq.

Gülnar Nazimqızı