PAŞA Bankın əməliyyat xərcləri 1,8% artıb

2026-cı ilin ilk yarısında “PAŞA Bank”ın əməliyyat xərcləri 103,2 mln manat təşkil edib.

Bunu “PAŞA Bank”ın İdarə Heyəti sədrinin müavini Bəhruz Nağıyev deyib.

Onun sözlərinə görə, bu göstərici ötən ilin eyni dövrü ilə müqayisədə 1,8% artıb. 2025-ci ilin ilk yarısında bankın əməliyyat xərcləri 101,4 mln manat olub.

Xərclərin gəlirə nisbəti 2025-ci ilin eyni dövründəki 45,62%-dən 47,01%-ə yüksəlib.

Nağıyev bildirib ki, hesabat dövründə bankın əməkdaşlarının sayı 1 600 nəfərdən 1 539 nəfərə azalsa da, işçilər üzrə ümumi xərclər 63,7 mln manatdan 66 mln manata yüksəlib.

Proqram təminatına çəkilən xərclər 6,8 mln manatdan 8,2 mln manata, loyallıq milləri üzrə xərclər isə 1,9 mln manatdan 3,4 mln manata artıb.

Eyni zamanda, xeyriyyə və sponsorluq xərcləri 2,9 mln manatdan 632 min manata, peşəkar xidmətlərə çəkilən xərclər isə 3,3 mln manatdan 2,9 mln manata enib.

Nağıyev qeyd edib ki, investisiyaların 80%-dən çoxu əməkdaşlara, proqram təminatına və infrastruktura yönəldilib.

Aytac