Murad Süleymanov: PAŞA Bank səhmdarlarına 107 milyon manat dividend elan edib

“PAŞA Bank” 2026-cı ilin iyununda səhmdarlarına 107,043 milyon manat dividend elan edib.

Bunu “PAŞA Bank”ın İdarə Heyətinin üzvü, Baş Maliyyə İnzibatçısı Murad Süleymanov deyib.

Onun sözlərinə görə, 30 iyun 2026-cı il tarixinə bankın bir səhm üzrə əsas və azaldılmış gəliri (EPS) 5,16 manat, orta kapital gəlirliliyi (ROAE) isə 10,3% təşkil edib.

Süleymanov bildirib ki, elan edilmiş dividendin 53,5225 milyon manatı, yəni hər səhm üzrə təxminən 2,86 manat 10 iyulda ödənilib. Qalan 53,5225 milyon manatın isə oktyabrın ikinci yarısında ödənilməsi planlaşdırılır.

O qeyd edib ki, 107 milyon manatlıq dividend üzrə ödəmə əmsalı 57,7%, 2025-ci ilin dekabrında ödənilən 129 milyon manat dividend üzrə isə 59% olub. Bankın minimal dividend ödəmə əmsalı xalis mənfəətin 30-40%-i səviyyəsində müəyyən edilib.

Murad Süleymanov əlavə edib ki, bankın 2026-cı il üzrə dividend ödəmə əmsalı ilə bağlı gözləntisi ilin sonunda açıqlanacaq.

Aytac