Azərbaycan XİN Fransanın Azərbaycana səyahət xəbərdarlığını pisləyib

Azərbaycan Xarici İşlər Nazirliyi Fransanın Azərbaycana səyahət xəbərdarlığını “özbaşına saxlanılma və ədalətsiz məhkəmə araşdırması riski” ilə əsaslandırmasını qətiyyətlə pisləyib.

Bu barədə XİN Mətbuat xidməti idarəsinin rəisi Ayxan Hacızadə Fransanın Avropa və Xarici İşlər Nazirliyinin mətbuat katibinin sentyabrın 17-də Azərbaycana səyahət xəbərdarlığı ilə bağlı açıqlamasına münasibət bildirərkən deyib.

O qeyd edib ki, ayrı-ayrı cinayət işləri üzrə Azərbaycan qanunvericiliyinə uyğun aparılan məhkəmə proseslərinin siyasi mülahizələr əsasında təqdim edilməsi və Azərbaycan məhkəmə sisteminə müdaxilə cəhdləri qəbuledilməzdir.

“Fransanın Azərbaycanla bağlı belə ittihamlar səsləndirərkən öz hüquq-mühafizə və penitensiar sistemində mövcud problemləri nəzərə almaması diqqətdən kənarda qala bilməz”, - Hacızadə bildirib.

XİN rəsmisi həmçinin Fransa tərəfini Azərbaycanla bağlı “əsassız və qərəzli iddialardan” çəkinməyə, ölkənin suverenliyinə və daxili işlərinə hörmət etməyə, ikitərəfli münasibətlərə zərər vuran yanaşmalara son qoymağa çağırıb.