Liderlərin keyfiyyəti şirkətlərin və ölkənin rəqabət qabiliyyətini müəyyən edir - Cəlal Qasımov

Liderlik keyfiyyətlərinin inkişafı şirkətlərin, dövlət qurumlarının və ölkənin rəqabət qabiliyyətinin artırılmasında mühüm rol oynayır.

Bunu “PAŞA Holdinq”in baş icraçı direktoru Cəlal Qasımov ADA Universitetində Liderlik və İnnovasiya üzrə IE Mərkəzinin “AZEMBA” proqramının açılışında deyib.

O bildirib ki, proqramın məqsədi “IE University”nin beynəlxalq təcrübəsini Azərbaycanın biznes və idarəetmə mühiti ilə əlaqələndirməkdir.

“Liderlik yalnız təlimlərlə formalaşmır. Liderlik bilik və praktiki təcrübənin birləşdiyi, çətin situasiyalarda düzgün qərarların verilməsinin öyrənildiyi zaman inkişaf edir”, - deyə C.Qasımov bildirib.

Onun sözlərinə görə, proqrama 850-dən çox müraciət daxil olub və ilk kohortaya 40 nəfər seçilib. Onlardan 16-sı “PAŞA Holdinq” və onun şirkətlərini, 16-sı dövlət qurumları və əlaqədar biznesləri, 8-i isə digər biznes qurumlarını təmsil edir.

Qasımov qeyd edib ki, proqramın iştirakçıları müxtəlif qurumların idarəetmə yanaşmalarını və təcrübələrini müqayisə etmək imkanı əldə edəcəklər.

Aytac