KPMG rəhbəri: Azərbaycan regional biznes platformasına çevrilə bilər

Azərbaycan istedadlı kadrlar, beynəlxalq biznes standartları və regional bağlantılar baxımından biznes üçün regional platformaya çevrilmək potensialına malikdir. Bunu KPMG-nin Azərbaycandakı İdarəedici Partnyoru və KPMG Qafqaz və Mərkəzi Asiya üzrə İnfrastruktur Sektorunun rəhbəri Vitaliy Yakovlev Bakıda keçirilən Azərbaycan Beynəlxalq İnvestisiya Forumunda deyib.

Onun sözlərinə görə, Azərbaycanı regional biznes platformasına çevirmək üçün üç əsas amil — insan kapitalı, beynəlxalq standartlara uyğun biznes infrastrukturu və yeni bazarlara çıxış imkanları vacibdir.

Yakovlev bildirib ki, ölkədə gənc və peşəkar kadrların, xüsusilə İT, mühəndislik və dizayn sahələrində mütəxəssislərin sayı artır.

O, həmçinin Azərbaycanın beynəlxalq maliyyə hesabatlılığı, komplayens və biznes prinsiplərini tətbiq edən şirkətlərin fəaliyyət göstərdiyi bazar olduğunu qeyd edib.

“Azərbaycanın regional bağlantısı, o cümlədən Orta Dəhliz və enerji dəhlizləri ölkənin mövqeyini gücləndirir”, — Yakovlev deyib.

KPMG rəhbəri investorlar üçün əsas məsələlərdən birinin vergi güzəştlərindən daha çox sabit və aydın tənzimləmə olduğunu vurğulayıb.

Onun sözlərinə görə, gömrük, miqrasiya, valyuta tənzimlənməsi, kapital və arbitraj sahələrində ardıcıl qaydaların tətbiqi investorların ölkədə özlərini daha rahat hiss etməsinə imkan verə bilər.

Aytac Zeynalova