ABŞ rəsmisi: Transxəzər marşrutu Avrasiya ticarətini dəyişə bilər

Transxəzər Beynəlxalq Ticarət Marşrutu (Orta Dəhliz) bütün Avrasiya üzrə ticarət əlaqələrini əhəmiyyətli dərəcədə dəyişdirmək potensialına malikdir. Bunu ABŞ-nin Azərbaycandakı müvəqqəti işlər vəkili Emi Karlon  deyib.

Onun sözlərinə görə, marşrut Mərkəzi Asiya, Xəzər dənizi və Cənubi Qafqazı ABŞ və Avropa bazarları ilə əlaqələndirir və onun tam reallaşdırılması marşrutun keçdiyi bütün ölkələrə fayda verə bilər.

“Bu ticarət marşrutu sadəcə infrastruktur deyil. O, iqtisadiyyatlar, əhali və sizin gələcəyiniz arasında körpüdür”, - Karlon deyib.

O bildirib ki, ABŞ regional bağlantının genişləndirilməsini prioritet hesab edir və Transxəzər Müəssisə Fonduna 201 milyon dollar ayrılması da bu istiqamətdə atılan addımlardandır.

“ABŞ CAMCA regionunu böyük iqtisadi və insan potensialına malik məkan kimi görür”, - deyə Karlon qeyd edib.

ABŞ rəsmisi həmçinin 2026-cı ilin fevralında ABŞ vitse-prezidenti Cey Di Vens və Azərbaycan Prezidenti İlham Əliyev tərəfindən imzalanan Strateji Tərəfdaşlıq haqqında Xartiyanın enerji, ticarət və tranzit, süni intellekt və rəqəmsal infrastruktur, eləcə də təhlükəsizlik və müdafiə sahələrini əhatə etdiyini bildirib.

Karlon 2025-ci ilin avqustunda ABŞ Prezidenti Donald Trampın Azərbaycan Prezidenti İlham Əliyev və Ermənistanın Baş naziri Nikol Paşinyanı Ağ Evdə qəbul etdiyini və görüşdə sülh sazişinin ilkinləşdirildiyini də xatırladıb.

O, CAMCA proqramının müxtəlif ölkə və peşə sahələrindən olan gənc mütəxəssisləri bir araya gətirdiyini, bu əlaqələrin regional əməkdaşlığın inkişafında mühüm rol oynadığını vurğulayıb.

Aytac