İlham Əliyev Si Cinpini Çinin Milli Günü münasibətilə təbrik edib

Azərbaycan Prezidenti İlham Əliyev Çin Xalq Respublikasının Sədri Si Cinpinə 1 Oktyabr – Çin Xalq Respublikasının Yaranması Günü münasibətilə təbrik məktubu göndərib.

Məktubda Azərbaycan Prezidentinin Çin xalqını bayram münasibətilə təbrik etdiyi və ən xoş arzularını çatdırdığı bildirilib.

İlham Əliyev məktubunda Çinin Si Cinpinin rəhbərliyi ilə müxtəlif sahələrdə əldə etdiyi nailiyyətləri qeyd edib.

Azərbaycan-Çin münasibətlərinə toxunan Prezident iki ölkə arasında yüksək səviyyəli siyasi dialoq, qarşılıqlı etimad və əməkdaşlığın inkişaf etdiyini bildirib. O, əlaqələrin hərtərəfli strateji tərəfdaşlıq səviyyəsinə yüksəldiyini qeyd edib.

Məktubda iqtisadi-ticari, nəqliyyat-logistika, sərmayə, enerji, kənd təsərrüfatı və humanitar sahələrdə əməkdaşlığın inkişaf etdiyi vurğulanıb.

İlham Əliyev həmçinin Azərbaycan və Çin arasında vizasız gediş-gəliş rejiminin insanlararası təmaslara və turizmin inkişafına təkan verdiyini bildirib.

Prezident “Kəmər və yol” təşəbbüsü, Orta Dəhliz və Mərkəzi Asiya ölkələri ilə həyata keçirilən bağlantı layihələrinin əhəmiyyətini də qeyd edib.

Məktubda enerji sahəsində əməkdaşlığa xüsusi yer ayrılıb. İlham Əliyev Çinin “Universal Energy” şirkətinin Azərbaycanda bərpaolunan enerji sahəsində fəaliyyətini və şirkətin inşa etdiyi “Qobustan” Günəş Elektrik Stansiyasının açılışını iki ölkə arasında iqtisadi əlaqələrin şaxələndirilməsinin nümunəsi kimi qeyd edib.

Prezident məktubunun sonunda Azərbaycan-Çin dostluq və hərtərəfli strateji tərəfdaşlıq münasibətlərinin bundan sonra da inkişaf edəcəyinə əminliyini ifadə edib, Si Cinpinə möhkəm cansağlığı və fəaliyyətində uğurlar, Çin xalqına isə əmin-amanlıq və firavanlıq arzulayıb.