Bakı–Tbilisi–Bakı marşrutu üzrə onlayn bilet alışında yeni qaydalar tətbiq edilir

Azərbaycan Dəmir Yolları (ADY) Bakı–Tbilisi–Bakı marşrutu üzrə onlayn bilet alışında yeni verifikasiya qaydaları tətbiq edir.Bu barədə ADY-dən məlumat verilib.

Yeni qaydalara əsasən, Azərbaycan vətəndaşları ADY-nin rəsmi saytında və “ADY Mobile” tətbiqində şəxsi kabinetlərini “MyGov ID” vasitəsilə verifikasiya etməlidirlər. FİN kodu daxil edildikdən sonra zəruri məlumatlar sistemdə avtomatik əks olunacaq.

Bilet almaq üçün şəxsi kabinetin verifikasiyasının tamamlanması məcburidir.

Xarici ölkə vətəndaşları isə verifikasiya zamanı vətəndaşı olduqları ölkənin adını və telefon nömrəsini daxil etməli, telefon nömrəsini SMS vasitəsilə göndərilən OTP kodu ilə təsdiqləməlidirlər.

ADY bildirib ki, yeni qaydalar sərnişinlərin maraqlarının qorunması və onlayn bilet alışında mümkün sui-istifadə hallarının qarşısının alınması məqsədi daşıyır.

Qeyd olunub ki, “ADY Mobile” tətbiqində verifikasiyadan keçmək üçün istifadəçilər saat 00:00-dan sonra tətbiqi yeniləməlidirlər.