Ələt AİZ-də hava limanı 2027-ci ilin yazında istifadəyə hazır olacaq

Azərbaycanın Ələt Azad İqtisadi Zonasında (AİZ) inşa olunan hava limanının 2027-ci ilin martın sonu və ya aprelin əvvəlində istismara hazır olması planlaşdırılır. Bunu “Ələt” AİZ-in İdarə Heyətinin sədri Valeh Ələsgərov Bakıda keçirilən “Almaniya-Azərbaycan: Strateji Tərəfdaşlıq və Bağlantılar” konfransında deyib.

Ələsgərovun sözlərinə görə, hava limanının tikintisinə 2024-cü ilin aprelində başlanılıb və işlərin bu ilin sonuna qədər tamamlanması gözlənilir.

Layihənin həyata keçirilməsi üçün AİZ ərazisində 750 hektar torpaq sahəsi ayrılıb. Hava limanı və ona bitişik logistika infrastrukturu yerli yük aviadaşıyıcısı “Silk Way Airlines” ilə əməkdaşlıq çərçivəsində inkişaf etdirilir.

“Ələt” AİZ-in əsas üstünlüklərindən biri onun “Şimal-Cənub” və “Şərq-Qərb” beynəlxalq nəqliyyat dəhlizlərinin kəsişməsində və Bakı Beynəlxalq Dəniz Ticarət Limanının yaxınlığında yerləşməsidir.

Ələsgərov bildirib ki, hava limanının ilk mərhələdə illik yükdaşıma gücü 500 min ton olacaq. Sonrakı mərhələdə bu göstəricinin ildə ən azı 2 milyon tona çatdırılması nəzərdə tutulur.

Onun sözlərinə görə, hava nəqliyyatı infrastrukturunun yaradılması yüksək texnologiyalı istehsal sahələrinin inkişafı və AİZ-in investisiya cəlbediciliyinin artırılması baxımından mühüm əhəmiyyət daşıyır.

Aytac