AİB Biləcəri–Yalama dəmir yolunun modernləşdirilməsinə $350 mln ayırmağı planlaşdırır

Asiya İnkişaf Bankı (AİB) Azərbaycanda 192 kilometrlik ikixətli Biləcəri–Yalama dəmir yolu xəttinin modernləşdirilməsinə $350 milyon kredit ayırmağı planlaşdırır, AİB-in ölkə direktoru Sunniya Durrani-Camal bildirib.

Vəsait dəmir yolu xəttində müasir elektrikləşdirmə, siqnalizasiya və telekommunikasiya sistemlərinin quraşdırılmasına yönəldiləcək. Biləcəri–Yalama xətti Mərkəzi Asiya Regional İqtisadi Əməkdaşlıq (CAREC) nəqliyyat şəbəkəsinin əsas hissələrindən biridir.

Layihə xəttin elektrik təchizatının sabit cərəyandan dəyişən cərəyana keçirilməsini nəzərdə tutur. Modernləşdirmənin qatarların hərəkət sürətini və təhlükəsizliyini artıracağı, enerji istehlakı və texniki xidmət xərclərini, həmçinin istixana qazı emissiyalarını azaldacağı gözlənilir.

Layihə, həmçinin “Azərbaycan Dəmir Yolları” QSC-nin layihələrin idarə edilməsi sahəsində potensialının gücləndirilməsini nəzərdə tutur.

AİB bundan əvvəl Azərbaycanın dəmir yolu sektorunun inkişafı proqramı çərçivəsində 166 kilometrlik Sumqayıt–Yalama dəmir yolu hissəsinin modernləşdirilməsi və yenidən qurulmasını maliyyələşdirib.
 

Aytac Zeynalova