Polşada vağzalı və məktəbi partlatmaqla hədələyən gənc saxlanılıb

Polşanın Poznan şəhərində məktəbi, dəmir yolu vağzalını və platformaları partlatmaqla hədələyən 19 yaşlı gənc saxlanılıb.Bu barədə RMF24 məlumat yayıb.

Məlumata görə, gənc sentyabrın sonunda bir neçə qurumun elektron poçt ünvanına partlayıcı maddələrdən istifadə ilə bağlı hədələr göndərib. Məktublardan birində özünü şagird kimi təqdim edərək məktəbdə partlayıcı qurğu ilə özünü partlatmaqla hədələyib. Digər məktubda isə Poznan şəhərinin əsas dəmir yolu vağzalını və platformaları partlatmaqla hədələyib.

O, hədələrdən imtina etmək müqabilində Poznanın Strşeşin rayonundakı parkda çamadanda qoyulması üçün 300 min zlotı (77 min ABŞ dollarından çox) tələb edib.

Polis məktəbi, vağzalı və platformaları yoxlayıb, lakin ərazilərdə hər hansı partlayıcı qurğu aşkarlanmayıb. Eyni zamanda, təxliyəyə ehtiyac yaranmayıb.

Kibercinayətkarlıqla Mübarizə üzrə Mərkəzi Büronun mütəxəssisləri və polis əməkdaşları elektron məktubların müəllifini müəyyən ediblər. Şübhəlinin evində elektron cihazlar götürülüb və həmin cihazlarda göndərilən məktublar aşkarlanıb.

19 yaşlı şəxs yalançı həyəcan yaratmaqda ittiham olunub. O, 6 aydan 8 ilədək azadlıqdan məhrum edilə bilər.