Cüdo üzrə dünya çempionatının bayrağı Qazaxıstana təhvil verilib

Bakıda keçirilən cüdo üzrə böyüklər arasında dünya çempionatı çərçivəsində Beynəlxalq Cüdo Federasiyasının (BCF) bayrağının təhvil-təslim mərasimi keçirilib.

Azərbaycan Cüdo Federasiyasının mətbuat xidmətindən verilən məlumata görə, Milli Gimnastika Arenasında təşkil olunan mərasimdə federasiyanın vitse-prezidenti Elnur Məmmədli, BCF-nin baş katibi Lisa Allan və Qazaxıstan Cüdo Federasiyasının prezidenti Kuanışbek Yesekeyev iştirak ediblər.

Mərasim zamanı BCF-nin bayrağı arenadakı dirəkdən endirilərək səhnəyə gətirilib. Elnur Məmmədli bayrağı Lisa Allana, o isə 2027-ci ildə dünya çempionatına ev sahibliyi edəcək Qazaxıstanın nümayəndəsi Kuanışbek Yesekeyevə təqdim edib.

Beləliklə, dünya çempionatına ev sahibliyi simvolik olaraq Bakıdan Astanaya keçib.

Mərasimin sonunda 2027-ci ildə Qazaxıstanın paytaxtında keçiriləcək dünya çempionatına həsr olunan təqdimat videosu nümayiş etdirilib.

Azərbaycan cüdoçuları Bakıda keçirilən dünya çempionatını bir qızıl, iki gümüş və dörd bürünc olmaqla, ümumilikdə yeddi medalla başa vurublar.