Azərbaycan və Qazaxıstan Xəzərin dibi ilə fiber-optik xətti işə salır - Tokayev

Qazaxıstan və Azərbaycan Avrasiya üzrə məlumat ötürülməsini yaxşılaşdırmaq üçün Xəzər dənizinin dibi ilə çəkilən fiber-optik xətti işə salır. Bunu Qazaxıstan Prezidenti Kasım-Jomart Tokayev cümə axşamı Bakıda bildirib.

“Bu gün Qazaxıstan və Azərbaycan Xəzər dənizinin dibi ilə keçən Transxəzər fiber-optik xəttini birgə işə salmaqla mühüm mərhələyə qədəm qoyurlar”, - Tokayev Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) Zirvə görüşündə deyib.

Onun sözlərinə görə, “Rəqəmsal İpək Yolu” layihəsi Avrasiya üzrə məlumatların daha sürətli və təhlükəsiz ötürülməsini təmin edəcək və Asiyanın rəqəmsal imkanlarını gücləndirəcək.

Tokayev xəttin kommersiya istismarına başlayıb-başlamadığını dəqiqləşdirməyib, onun ötürmə qabiliyyəti və dəyəri barədə məlumat verməyib.

Qazaxıstan Prezidenti həmçinin AQEM üzvlərinə Orta Dəhliz, “Şimal–Cənub” beynəlxalq nəqliyyat dəhlizi və TRACECA daxil olmaqla əsas beynəlxalq marşrutları əhatə edən nəqliyyat əlaqələri strategiyasını birgə hazırlamağı təklif edib.

Gülnar Nazimqızı