Moratinos: Azərbaycan və Ermənistan dini abidələrin qorunması üçün BMT-yə etibar edir

BMT Sivilizasiyalar Alyansı Azərbaycan və Ermənistanın etimadı əsasında regionda dini abidələrin qorunması istiqamətində fəaliyyətini davam etdirməyə hazırdır. Bunu Alyansın ali nümayəndəsi Migel Anxel Moratinos Bakıda keçirilən 7-ci Üümüdünya Mədəniyətlərarası Diaqloq forumunda çıxışı zamanı bildirib. 

O bildirib ki, təşkilatın əsas məqsədlərindən biri mədəniyyətlərarası dialoqun təşviqi ilə bağlı bəyanatları konkret fəaliyyətə çevirməkdir.

BMT Baş katibinin müavini, BMT Sivilizasiyalar Alyansının ali nümayəndəsi Migel Anxel Moratinos Bakı forumunda çıxışı zamanı deyib ki, dini abidələrin qorunması təşkilatın əsas fəaliyyət istiqamətlərindən biridir.

Onun sözlərinə görə, iki il əvvəl dini və ənənəvi liderlərin sammitində dini abidələrin qorunması və möhkəmləndirilməsi məsələlərinə həsr olunmuş xüsusi sessiya keçirilib. Moratinos Azərbaycan və Ermənistanın bu sahədə BMT Sivilizasiyalar Alyansına etimad göstərməsini vacib hesab etdiyini bildirib.

Moratinos qeyd edib ki, Azərbaycan və UNESCO ilə birgə başladılan “Sülh üçün mədəniyyət” təşəbbüsü çərçivəsində Qafqaz və Mərkəzi Asiya ölkələrindən olan gənclərin iştirakı ilə Gənc Sülh Qurucuları proqramı həyata keçirilir.

Proqramda Azərbaycan, Ermənistan, Gürcüstan, Qazaxıstan, Qırğızıstan, Tacikistan, Türkmənistan və Özbəkistandan olan iştirakçılar birgə fəaliyyət göstərirlər.

O bildirib ki, Bakı forumu çərçivəsində 44-dən çox ölkənin təmsil olunduğu Gənclər Forumu da təşkil edilib. Moratinos gənclərin qarşılıqlı əlaqəsinin mədəniyyətlərarası dialoqun inkişafına töhfə verdiyini vurğulayıb.

Alyansın digər təşəbbüsləri sırasında gənclərin yerli icmalarda fəaliyyətini dəstəkləyən maliyyə fondu, təqaüd proqramı, stereotiplər, ksenofobiya və ayrı-seçkiliklə mübarizəyə yönələn “Plural Plus” təşəbbüsü, Mədəniyyətlərarası İnnovasiya Mərkəzi və Gənc Səfirlər Şəbəkəsi var.

Moratinosun sözlərinə görə, BMT Sivilizasiyalar Alyansı antisemitizm və islamofobiya ilə mübarizə istiqamətində də fəaliyyət göstərir.

O əlavə edib ki, təşkilatın maliyyə imkanları məhdud olsa da, təşəbbüslərin həyata keçirilməsində yerli icmalarla əməkdaşlığa üstünlük verilir. Moratinosun fikrincə, mədəniyyətlərarası dialoqun real nəticələr verməsi üçün müxtəlif qrupların iştirakını təmin edən mexanizmlərin yaradılması vacibdir.

Gülnar Nazimqızı