Bratislava-Bakı marşrutu üzrə ilk birbaşa reys həyata keçirilib

Slovakiyanın paytaxtı Bratislava ilə Bakı arasında “Wizz Air” aviaşirkətinin ilk birbaşa reysi həyata keçirilib.Bu barədə Azərbaycanın Slovakiyadakı səfiri Vüsal Abdullayev “X” sosial şəbəkə hesabında paylaşım edib.

“Wizz Air”in Bratislava-Bakı birbaşa hava marşrutunun açılış tədbirində iştirak etməkdən böyük məmnunluq duyuram”, – diplomat qeyd edib.

Səfir birbaşa hava əlaqəsinin fəaliyyətə başlamasını Azərbaycan-Slovakiya münasibətlərində əlamətdar hadisə və iki ölkənin strateji tərəfdaşlığının mühüm nailiyyəti kimi qiymətləndirib.

Onun sözlərinə görə, yeni marşrut işgüzar əlaqələr, turizm və insanlar arasında təmaslar üçün geniş imkanlar yaradacaq.

“Report”un məlumatına görə, Bratislavadan yola düşən təyyarənin Bakıya saat 21:20-də eniş etməsi gözlənilir. Bu istiqamət üzrə uçuşlar həftədə iki dəfə – çərşənbə və şənbə günləri həyata keçiriləcək.