Sabah bu ərazilərdə işıq olmayacaq

Oktyabrın 30-da Bakının Yasamal və Səbail rayonlarında, eləcə də Abşeronda elektrik şəbəkəsində təmir işləri aparılacaq.Bu barədə “Azərişıq” ASC məlumat yayıb.

Bildirilib ki, Yasamal rayonunda saat 10:00-dan 13:00-dək Kazım Kazımzadə və Şəfayət Mehdiyev küçələrində, həmçinin İkinci Alatava yaşayış massivinin bir hissəsində elektrik enerjisinin verilişi məhdudlaşdırılacaq.

Səbail rayonunun Bayıl qəsəbəsində, Gülbala Əliyev küçəsində isə saat 10:00-dan 14:00-dək elektrik enerjisinin verilişində fasilə yaranacaq.

Abşeron Rayon Enerji Təchizatı və Satışı İdarəsinin xidmət ərazisində yerləşən 110/35/10 kV-luq 137 saylı yarımstansiyada da təmir işləri aparılacaq. Bununla əlaqədar saat 10:00-dan 16:00-dək 35/6 kV-luq “Pirəkəşkül”, “Çaylı” və “Cəngi” yarımstansiyaları, eləcə də “Pirəkəşkül” yarımstansiyasından qidalanan bəzi 6 kV-luq hava xətləri enerjisiz qalacaq. Həmçinin Çaylı, Cəngi və Təzəkənd kəndlərində elektrik enerjisinin verilişi müvəqqəti dayandırılacaq.

Qeyd olunub ki, təmir işləri başa çatdıqdan sonra abonentlərin elektrik enerjisi ilə təchizatının keyfiyyəti və dayanıqlılığı artırılacaq.