“Axmaq addımlar atmaq lazım deyil” - Fatih Terim

Bu gün AÇ-2016-nın seçmə mərhələsi çərçivəsində son oyununa çıxacaq Türkiyə millisi pley-off-a qatılmaq şanslarını saxlayır.

"Qafqazinfo” xəbər verir ki, qrup lideri İslandiya millisi ilə üz-üzə gələcək qardaş ölkə yığması rəqibini məğlub etməlidir. Hətta Türkiyə yığması qələbə qazanıb Qazaxıstanın Latviyanı məğlub edəcəyini gözləyib ən yaxşı 3-cü yer sahibi kimi qitə birinciliyinə birbaşa vəsiqə də əldə edə bilər. Bu gün baş tutacaq oyundan öncə komandanın baş məşqçisi Fatih Terim jurnalistlər önünə çıxıb: "İslandiya millisini təbrik edirəm. Biz də AÇ-nin final mərhələsinə qatılmaq istəyirik. Fərqi yoxdur ki, ora necə vəsiqə qazanacağıq. Əsas olan bunu bacarmaqdır. Düzünü desək, çox çətin durumdur. Biz hamımız milli komandanın bir parçasıyıq. Allah bizə kömək etsin. Ölkədə baş verən son hadisələr də bizə çox pis təsir edib. Futbolçular da bu vəziyyətdən sarsılıblar. Hər kəs əlindən gələni etməlidir. Kimin tankı, topu varsa, ortaya qoymalıdır. İndi isə futboldan danışaq. Biz Hollandiyanı qabaqlamaqla böyük iş gördük. Bunun davamını gətirməliyik”.

Təcrübəli mütəxəssis komandanın oyun fəlsəfəsində dəyişiklik olduğunu qeyd edib: "Bizim komandanın oyununda müəyyən dəyişiklik var. Statistika futbolda önəmli deyil. Komandanın nə istədiyi birinci planda olmalıdır. Yeni söz-söhbətlərdən sıxıldım. Nəyisə dəyişmək üçün nəsə axmaq addımlar atmaq lazım deyil. Biz fədakarlıq etməliyik”.
www.ann.az