"Real"ı kubokdan kənarlaşdırsalar..." – Perez

"Real" (Madrid) klubunun prezidenti Florentino Perez komandasının İspaniya kubokundan kənarlaşdırılma təhlükəsindən danışıb.

Qol.Az-ın "Marca" qəzetinə istinadən verdiyi məlumata görə, Perez kubokdan kənarlaşdırılacağı təqdirdə Beynəlxalq Arbitraj Məhkəməsinə müraciət edəcəklərini bildirib:

"Denis Çerışevin cəzalı duruma düşməsi ilə bağlı nə İspaniya Futbol Federasiyasından, nə də "Vilyareal" klubundan bizə bildiriş gəlməyib. Onun "Kadiz"lə matçda oynamaq hüququnun olmadığını bilmirdik. Belə görünür, bizi kubok yarışından kənarlaşdırmaq istəyirlər. Əgər bu baş verərsə, biz Beynəlxalq Arbitraj Məhkəməsinə müraciət edəcəyik".

Qeyd edək ki, ötən mövsüm "Vilyareal"da icarə əsasında oynayan Çerışev "Real Sosyedad", "Hetafe" və "Barselona" ilə görüşlərdə sarı vərəqə ilə cəzalandırılıb. Ardıcıl üç matçda sarı vərəqə almaqla cəzalı duruma düşən rusiyalı futbolçu İspaniya kubokunun 1/16 final mərhələsinin "Kadiz"lə ilk oyununu buraxmalı idi. Lakin start heyətində meydana çıxan 24 yaşlı futbolçu 3-cü dəqiqədə qol da vurub. Oyun isə "Real"ın 3:1 hesablı qələbəsi ilə başa çatıb. İspaniya Futbol Federasiyasının bu qayda pozuntusuna görə "Real"ı kubokdan kənarlaşdıracağı gözlənilir.