Türkiyə superliqasında iki günlük baş məşqçi

Türkiyə superliqa təmsilçisi "Mersin İdmanyurdu" klubunda növbəti baş məşqçi istefası gerçəkləşib.

Qol.Az-ın Türkiyə mətbuatına istinadən verdiyi məlumata görə, Nurullah Sağlamın komandadakı fəaliyyəti cəmi iki gün çəkib.

Klubla 1,5 illik müqavilə imzalayan Sağlam Türkiyə kubokunun qrup mərhələsində "Bucaspor"a məğlubiyyətdən (1:2) sonra istefa verib. Bu barədə açıqlama verən "Mersin İdmanyurdu"nun prezidenti Hüseyn Çalışkan deyib:

"Nurullah Sağlam oyundan sonra mənə "komanda doğru-düzgün məşq etməyib. Kimin əlindən tuturam tökülür" dedi. Ancaq istefa verəcəyi ilə bağlı heç nə söyləmədi. Bu barədə xəbəri internet saytlarının birindən öyrəndim. Klubun bazasından ayrılıb. Oteldə də yoxdur. Onun əlaqə yarada bilmirəm".

Qeyd edək ki, bu, cari mövsümdə "Mersin İdmanyurdu"nda 4-cü baş məşqçi istefası olub. Daha öncə Məsut Bakkal, Bülənt Qorxmaz və Hakan Kutlu ilə problem yaşayan superliqa təmsilçisinin bu dəfə kimi baş məşqçi vəzifəsinə gətirəcəyi maraqla gözlənilir.