Rooney-nin getmək fikri yoxdur

İslandiyaya acı məğlubiyyətdən (1:2) sonra İngiltərə yığmasının baş məşqçisi Roy Hodgson istefa versə də, komandanın əsas ulduzu Wayne Rooney yığma karyerasını bitirmək fikrində deyil. 2004-cü ildən milli formanı geyən 30 yaşlı forvard Goal.com saytına belə açıqlama verib:

«Hələ turnirdən əvvəl demişdim ki, milli formanı geyməkdən qürur duyuram. Yeni baş məşqçinin kim olacağında maraqlıyam və həyəcanla gözləyirəm. Məni yığmaya çağırarlarsa, oynayacam».

O da maraqlıdır ki, Rooney iyunun 27-də meydana çıxmaqla yığmada oyun sayına (115) görə David Beckham-a çatdı və indi yalnız Peter Shilton-dan (125) geri qalır.  (Azadliq.org)