Buffon: «Neuer məndən güclüdür»

İtaliya yığmasının ünlü qolkiperi Gianluigi Buffon 1/8 finalda İspaniya üzərində qələbədən (2:0) sonra komandasının əzmkarlığını xüsusi qeyd edib. O həmçinin Almaniya yığmasından olan həmkarı Manuel Neuer-i dünyanın ən yaxşı qapıçısı adlandırıb.

Tmw Buffonun bu fikirlərinə yer verib:

«Həmişə tətikdə olmalıyam, əks halda oyundaşlarımın gördüyü bütün yaxşı işlərin üzərindən xətt çəkə bilərəm. Komandamızda ulduzlar olmasa da, meydanda canını qoymağa hazır olan futbolçular var. Həmişə yanımızda olan azarkeşləri məyus etmək istəmirik. Buffon, yoxsa Neuer? Əlbəttə, Neuer. O gəncdir, səviyyəlidir. Yaşıma görə müəyyən oyunçularla rəqabət apara bilmərəm. Ancaq İtaliya yığmasının və ya «Yuventus»un formasını geyəndə başqalarından pis görünməməyə çalışıram. Almaniya? Kağız üzərində onlar güclüdür. Ancaq oyun hər şeyi göstərəcək».

Xatırladaq ki, 1/4 finalda İtaliya məhz Almaniya ilə qarşılaşacaq. (Azadliq.org)