"Atletiko"nun azarkeşlərinə ağır cəza

İspaniya Futbol Federasiyasının İntizam Komitəsi La Liqanın 13-cü turunda keçirilən "Atletiko” (Madrid) - "Deportivo” matçında (2:0) yaşanan insidentlə bağlı müvafiq qərarlar çıxarıb.

Qol.Az-ın İspaniya mətbuatına istinadən verdiyi məlumata görə, komitə davada iştirak etmiş azarkeşləri cəzalandırıb.

Hər iki komandanın ümumilikdə 88 azarkeşinə 5 il ərzində stadiondan oyunu canlı izləməsinə qadağa qoyulub. Üstəlik həmin azarkeşlər 60 min avro cərimə ödəməli olacaqlar. 

Eyni zamanda "Visente Kalderon" stadionundan kənarda rəqib azarkeşləri təxribata sürükləyən və təhlükəsizlik xidmətinin əməkdaşlarına işlərini görməyə mane olan 4 "Atletiko"lu fanat bir il ərzində bütün idman müsabiqələrini izləmək hüququndan məhrum edilib. Həmin azarkeşlərə 3 min avro pul cəzası da kəsilib.  

Qeyd edək ki, "Atletiko" - "Deportivo" matçında stadionda yaşanan kütləvi davada qonaqların bir azarkeşi dünyasını dəyişmiş, 11 nəfər isə yaralanmışdı.