Avropa Liqası üçün yeni təklif

Çempionlar Liqasının kölgəsində qalan Avropa Liqasının nüfuzunun qaldırılması istiqamətində axtarışlar davam edir.

Apasport.az saytının məlumatına görə, UEFA rəhbərliyi ilə yanaşı, qərbi avropalılar da çıxış yollarını axtarırlar.

ESPN media şirkəti  bu yöndəki təklifləri ilə çıxış edib. Onların planları qrup mərhələsinə düşəcək Azərbaycan klublarının çıxışına da təsirsiz ötüşməyəcək.

3 bənddən ibarət təklifin birinci hissəsi oyunların tarixi ilə bağlıdı. Avropa Liqası matçlarının cümə axşamı deyil, 2 gün əvvəl baş tutması təklif olunur. Bu da onunla izah edilir ki, ardıcıl 2 gün Çempionlar Liqası həyəcanı yaşayan azarkeşlər üçün ardınca nisbətən zəif turnirin matçlarına baxmaq maraqlı olmur. Amma çərşənbə axşamı Avropa Liqası, çərşənbə və cümə axşamında Çempionlar Liqasının keçirilməsi bu marağın 3 gün davam etməsinə səbəb ola bilər.

Təklifin 2-ci hissəsində qitənin ən nüfuzlu klub turnirinin qrupunda 3-cü olanların Avropa Liqasına "transfer” olunması əksini tapıb. Avropalılar bu 8 komandanın 1/16, 1/8 və 1/4 finalda öz aralarında oynaması, yarımfinala isə yalnız birinin çıxmasını düzgün hesab edir. Belə olsa, digər komandaların yarımfinala çıxmaq şansları artır, yarışa maraq da müsbət istiqamətdə dəyişir.

Sonuncu bənd isə qrup mərhələsi zamanı komandaların regionlar üzrə qruplar təşkil etməsidi. Bu da klubları yorucu səfərlərdən qurtaracaq. Cari mövsümü Azərbaycan çempionu "Qarabağ”la eyni qrupda yer alan Fransa təmsilçisi "Sent-Etyen” nümunəsi önə çəkilir. Bu komanda Azərbaycan, Ukrayna və İtaliyaya səfərlərə çıxmalı olub.

Həmkarlarımız son mövsümün qrup mərhələsində çıxış edən 48 klubu da 4 zona üzrə bölüb. Belə olan halda hər regiona 3 qrup veriləcəkdi. Hətta Ağdam klubu Cənub-şərq regionuna daxil edilib. Burada Kipr, Yunanıstan, Türkiyə, Serbiya, Rumıniya, İsveçrə, Avstriya da təmsil olunub. Digər klublar da coğrafi yerinə əsasən Cənub-Qərb, Şimal-Qərb və Şimal-Şərq zonalarında 12-lik təşkil etməlidi.

Avropa Liqasının bu cür zonalara parçalanması ötən yaydan tətbiq olunsaydı, "Sent-Ertyen” (Fransa), "İnter” (İtaliya) və "Dnepr” (Ukrayna) klublarından heç biri "Qarabağ”a rəqib olmayacaqdı.