​Azərbaycan samboçuları "Bakı 2015"də mübarizəyə başlayır

"Report"un məlumatına görə, Azərbaycan bu idman növündə 4 kişi və 4 qadın idmançı ilə təmsil olunacaq. 8 idmançının hamısı mübarizəni 1/4 final mərhələsində davam etdirir.

İlk olaraq 90 kq çəki dərəcəsində Kənan Qasımov döşək üzərinə çıxacaq. O, ukraynalı İvan Vasilçukla üz-üzə gələcək. 67 kq-da Azərbaycanı təmsil edən İslam Qasımov rumıniyalı Orlando Qriyaya üstün gəlməyə çalışacaq. Ölkənin digər təmsilçisi 74 kq çəki dərəcəsində çıxış edən Amil Qasımovdur. Kişi samboçunun rəqibi slovakiyalı Tadej Cutuk və gürcüstanlı Kaxa Mamulaşvili cütünün qalibi olacaq. +100 kq-da mübarizə aparan Vasif Səfərbəyovun rəqibi isə Makedoniya idmançısı Bajro Maşovikj olacaq.

Qadınların mübarizəsində Nəzakət Xəlilova (52 kq) rumıniyalı Kodrina Yonesku ilə rəqib olacaq. 64 kq çəkidə Fəridə Qurbanova moldovalı Yekaterina Kretunu yenməyə çalışacaq. Nərminə Əlizadə belaruslu idmançı Volha Namazava ilə üz-üzə gələcək. Şəhanə Hüseynovanın rəqibi isə Yana Kostenko (Rusiya) - Şoren Şaradze (Gürcüstan) cütünün qalibi olacaq.

Qeyd edək ki, "Bakı 2015" I Avropa Oyunlarında sambo yarışları bir gün keçiriləcək. Ümumilikdə qaliblərə 8 dəst medal təqdim olunacaq.