"Neftçi"dən ayrılmağım qaçılmaz idi" – Stamenkoviç

"Neftçi"dən ayrılan qapıçı Saşa Stamenkoviç sabiq komandası haqda danışıb.

Qol.Az-ın məlumatına görə, 30 yaşlı qolkiper Serbiya mətbuatına açıqlamasında Azərbaycana və "Neftçi"yə olan sevgisindən danışıb.

"Neftçi" haqda danışmaq mənə çətindir. Avropa Liqasının I təsnifat mərhələsində "Mladost"la baş tutan ilk görüşdə "Neftçi"nin azarkeşləri mənim şəklim və üzərində "Saşa qayıt" yazılı pankart asdılar. Ürəyim dolu idi və gözlərim yaşardı. Çünki o insanları çox sevirəm. "Neftçi"nin azarkeşləri ilə yaxşı münasibətim var idi. Azərbaycan və Serbiya arasında da xüsusi əlaqələr var. Bu səbəbdən hər iki ölkə əbədi olaraq mənim qəlbimdə qalacaq". 

Stamenkoviç "Neftçi"dən ayrılmasının da səbəbini açıqlayıb. O, Bakı klubundan ayrılmağın qaçılmaz olduğunu bildirib: "Neftçi" maliyyə problemləri səbəbindən bir sıra futbolçularla yollarını ayırdı. Mənə komandada qalmaq təklif edildi. Lakin təklif edilən maaşla, dolanmaq çətin olardı. "Neftçi"də komanda ilə müqaviləsi olan çox az sayda legioner qaldı". 

Qeyd edək ki, 2011-2015-ci illərdə "Neftçi"nin şərəfini qoruyan Stamenkoviç karyerasını Moldovanın "Şerif" klubundan davam etdirəcək.