Britaniyalı olduğu düşünülən 19 yaşlı Michael Steven Sandford mitinq zamanı polisin silahını qapmağa çalışıb
Ötən həftəsonu Donald Trump-ın Las-Veqasda keçirilən kampaniya mitinqində polisin silahını qapmağa çalışan şəxs respublikaçı namizədi öldürmək istədiyini bildirib.
Britaniyalı olduğu düşünülən 19 yaşlı Michael Steven Sandford az sonra Nevada məhkəməsi qarşısına çıxarılmalıdır.
Məhkəmə sənədlərindən bəlli olur ki, Sandford Las Veqasda bir polis zabitinə yaxınlaşaraq Donald Trump-dan avtoqraf almaq istədiyini bildirib.
Onun üstündə Britaniya sürücülük vəsiqəsi olub və o, polisə il yarımdır ki, ABŞ-da yaşadığını deyib.
Həbs olunan şəxs müstəntiqlərə deyib ki, o artıq bir ildir Trump-ı güllələməyi planlaşdırırmış və nəhayət ötən həftəsonu bu akta hazır olduğunu düşünüb.
Bazar ertəsi bu hadisədən əvvəl Donald Trump onun təşviqat kampaniyasına başçılıq edən Corey Lewandowski-ni işdən azad edib.
Əvvəllər güllə atmayıb
Britaniya Xarici İşlər Nazirliyindən verilən məlumatda deyilir ki, hazırda Sandford-la bağlı məlumatlar ABŞ hüquq-mühafizə orqanlarına ötürülür.
Məhkəmə sənədlərindən məlum olur ki, Sandford əvvəllər heç vaxt güllə atmadığını, lakin iyunun 17-də məşq üçün Las Veqas atıcılıq mərkəzinə getdiyini deyib.
Mitinq vaxtı o bir polis zabitinin silahını qapmağa çalışıb, çünki dediyinə görə silah qoruyucu kiliddə olmayıb.
Sandford deyib ki, o, uzağı iki güllə atmağa macal tapacağını və çox güman öldürüləcəyini düşünürmüş.
Həbs olunan şəxs dindirmə zamanı bildirib ki, Trump-ı bu mitinqdə də vura bilməsə, onu Feniksdə keçirləcək növbəti mitinqdə vuracağını qət edibmiş.
Bu arada son rəy sorğuları cənab Trump-ın demokrat rəqibi Hillary Clinton-dan çox geridə qaldığını göstərir.
ABŞ mətbuatı yazır ki, xanım Clinton həlledici ştatlarda daha böyük populyarlığa malikdir.
Amerika prezidenti seçkiləri noyabrın 8-də keçirləcək. (Azadliq.org)
www.ann.az
Bizi sosial şəbəkələrdə izləyin !
