Rusiyanın təklifi rədd olunur

Suriyanın iki üsyançı qrupunun BMT-nin qara siyahısına salınmasına dair Rusiyanın xahişi rədd olunub. Diplomatların mayın 10-da dediyinə görə, Britaniya, Fransa, Birləşmiş Ştatlar və Ukrayna təklifi qəbul etməyib.

Rusiya xahiş etmişdi ki, Jaish Al- Islam (İslam Ordusu) və Ahrar Al-Sham sanksiya siyahısına salınsın. Səbəb də onların Al-Qaeda və İslam Dövləti silahlı qruplaşmaları ilə əlaqələri göstərilirdi.

Ancaq BMT-nin sanksiya siyahısına salınmaqdan ötrü BMT Təhlükəsizlik Şurasının 15 üzvünün konsensusu gərəkir. ABŞ və Şuranın daha 3 üzvü etirazını bildirib.

ABŞ-ın BMT-dəki missiyasının sözçüsü "Frans Pres” agentliyinə deyib ki, bu addım Suriyada döyüşlərin dayandırılması səylərinə mənfi təsir göstərər. (Azadliq.org)