Sarkisyan muzdluları tərk-silah edir

"Qarabağda "Yerkrap” muzdluları və erməni əsgərləri arasında qarşıdurma müşahidə edilir”.

Serj Sarkisyan Vyanadan qayıtdıqdan sonra Qarabağa könüllü gedən muzdlulara hazırda qismən sakitçilik olduğu və danışıqların aparıldığı üçün geri qayıtmağı əmr edib.

Oxu.Az xəbər verir ki, bu barədə "Qrapark” qəzeti yazır.

Qəzetin məlumatına görə, artıq dünəndən muzdlular qruplarla Ermənistana qayıdırlar. Aprel döyüşləri zamanı 4400 muzdlu Qarabağa təmas xəttinə yola düşüblər.

1700 muzdlu geyim və silah alaraq ön cəbhədə olub. İndi silahların təhvil-təslim prosesi gedir.

Bununla yanaşı qəzet yazır ki, muzdluların heç də hamısı silahı təhvil verib Qarabağı tərk etmək istəmir. Onlar Sarkisyanın əmrinə tabe olmaqdan boyun qaçırırlar və erməni ordusu tətəfindən itirilmiş mövqelər geri qayıtmayınca, Qarabağda qalacaqlarını bəyan ediblər.

Bütün bu olanlarla yanaşı, Qarabağda "Yerkrap” muzdluları və erməni əsgərləri arasında silahlı toqquşmaya dönə biləcək qarşıdurma müşahidə edilir.

Baş verən qarşıdurmanın səbəbləri haqqında bu yaxınlarda Vaan Badasyan danışıb. Onun sözlərinə görə, aprel döyüşləri zamanı Hadruta gələn "Yerkrap” yarım silahlı qruplaşmanın lideri general Manvel Qriqoryan erməni hərbçilərini təhqir edib.

Manvel Qriqoryan onlarla cipin müşayiəti ilə Hadruta gəlib, onun karvanına yol verməyən erməni hərbçilərinə qəzəblənib. Bu, Qriqoryanın muzdluları ilə erməni əsgərləri arasında qarşıdurmaya səbəb olub.

Bu hadisə Ermənistanda böyük narazıçılığa səbəb olub, amma Qriqoryanın və onun muzdlularının müdafiəsinə münaqişəni aradan qaldırmaq istəyən iqtidar partiyasının nümayəndələri qalxıb.