İrəvanda gənclərlə polis toqquşdu

Ermənistanda günlərdir hərbi xidmətdən möhlət hüququnun ləğvinə etiraz edən tələbələrlə polis əməkdaşları arasında toqquşma olub. İstiPress-in erməni mətbuatına istinadla verdiyi məlumata görə, toqquşma parlament binasının yaxınlığında qeydə alınıb. 

Gənclər parlamentin qarşısındakı küçəni bağlayıblar. Daha sonra onlar Baqramyan prospekti tərəfdən hərəkət edərək buradakı girişə gələn hissəni də bağlayıblar. 

Adıçəkilən prospektdə polis nəzarəti gücləndirib. İrəvanın polis rəisi Valeri Osipyan gənclərdən prospekti boşaltmağı tələb edib. "Biz sizi anlayırıq, amma gücdən istifadə etmək istəmirik". Polis gənclərə 5 dəqiqə vaxt verib. 

Bundan sonra polis gəncləri zorla ərazidən uzaqlaşdırmağa çalışıb. Lakin onlarla etirazçılar arasında toqquşma baş verib. Polis prospekti boşaltmağa hələ də nail ola bilməyib.