Fətullah Güləni erməni lobbisi maliyyələşdirir

Bunu AzVision.az-a açıqlamasında Türkiyədə fəaliyyət göstərən Əsassız Erməni İddialarına qarşı Mübarizə Dərnəyinin (ASİMDER) başqanı Göksel Gülbey deyib. 

G.Gülbey vurğulayıb ki, faktiki olaraq FETÖ Türkiyəyə qarşı erməni lobbisi ilə birlikdə hərəkət edir: "FETÖ mövcud olduğu bütün ölkələrdə erməni lobbisi və ABŞ-ın Soros Fondu ilə birlikdə işlər görür. Əminliklə demək olar ki, FETÖ onların əmrində fəaliyyət göstərir. 

Məsələn, Almaniya Parlamentində qondarma "erməni soyqırımı” layihəsinin qəbulu FETÖ-nün dəstəyi ilə mümkün olub. Nəticə açıqlanandan sonra parlamentdən kənar PKK-lılar və FETÖ-çülər erməni lobbisinin üzvləri ilə birlikdə bayram etmişdilər.

FETÖ lideri Fətullah Gülən 1964-cü ildə həm Papaya, həm də erməni lobbisinin patriklərinə qondarma "erməni soyqırımı”nı tanıdığını bəyan edən məktub yazıb. Həmin tarixlərdə Fətullah Gülən Abdullah Öcalanla Türkiyə Komunizmlə Mübarizə Dərnəyinin üzvü olublar. Abdullah Öcalanı 1990-cı ildə Türkiyəyə təslim edən ABŞ, həmin tarixdə Fətullah Güləni Pensilvaniyaya apardı”.

G.Gülbey deyib ki, F.Gülən gizli ermənidir: "Fətullah Gülən Türkiyədə yaşayan kripto-gizli ermənidir. Ailəsi əslən Muşdandır. Sonra Ərzuruma yerləşiblər. Hazırda Muşda erməni dərnəyi və çoxlu sayda erməni ailələri var. Gülən erməni olduğunu gizlətmir, onlarla işbirliyindədir. FETÖ-nün daha güclü olması üçün erməni lobbisi Gülənə maddi dəstək verir. Erməni lobbisi bundan əlavə Gülənin bir çox ölkələrdə məktəb açmasına yardım ediblər”.