Qırğızıstan TikTok-u qadağan edib

Qırğızıstan qeyri-hökumət təşkilatlarının TikTok-un uşaqların əqli inkişafına və ümumi rifahına təsiri ilə bağlı müraciətlərindən sonra TikTok-u qadağan edib. Bu barədə qərarı Mədəniyyət, İnformasiya, İdman və Gənclər Siyasəti Nazirliyi yayıb.

Qiymətləndirmədən sonra nazirlik belə qənaətə gəlib ki, platformada uşaqların potensial zərərli məzmuna daxil olmasının qarşısını almaq üçün adekvat istifadəçi nəzarəti yoxdur.

O həmçinin bildirib ki, platformada istifadəçilər üçün müvafiq yaş yoxlaması tədbirləri də yoxdur.

Nazirlik əlavə edib ki, TikTok istifadəçiləri qısa video kliplərin virtual aləminə cəlb edilir və bu kliplərə baxdıqdan sonra insanlar həyatı üçün təhlükə yaradan bəzi videoları təqlid etməyə çalışırlar.

Bu cür asılılıq yaradan məzmunun gənc nəslin emosional rifahına mənfi təsir göstərdiyi müşahidə edilib.

TikTok son vaxtlar qlobal miqyasda artan məhdudiyyətlər və qadağalarla üzləşir.

Rabia Hale Seferoğlu 
www.anews.az