ABŞ diplomatlarına çinlilərlə romantik münasibətləri qadağan etdi

ABŞ hökuməti Çində çalışan dövlət qulluqçularına və onların ailə üzvlərinə Çin vətəndaşları ilə romantik və ya seksual münasibətlər qurmağı qadağan edib, Associated Press məlumatlı mənbələrə istinadən xəbər verir.

Qadağa dövlət sirrinə çıxışı olan əməkdaşlara və onların ailə üzvlərinə şamil olunur.

Bu qərar 2025-ci ilin yanvarında, ABŞ-ın Çindəki səfiri Nikolasa Börnsun istefasından əvvəl qəbul edilib. Qadağa Pekindəki səfirlik və Quançjou, Şanxay, Şenyan, Uxan və Honq Konq daxil olmaqla, Çindəki bütün ABŞ diplomatik missiyalarını əhatə edir.

Mövcud münasibətləri olan əməkdaşlara istisna tətbiq oluna bilər – onlar xüsusi icazə üçün müraciət edə bilərlər. İcazə verilmədiyi halda, əməkdaş ya münasibətləri bitirməli, ya da vəzifədən getməlidir.

Yeni tədbirlər ABŞ Konqresinin əvvəlki qaydaların qeyri-kafiliyinə dair narahatlığı fonunda tətbiq edilib. 2024-cü ilin iyulunda Çinli əməkdaşlarla münasibətləri məhdudlaşdıran dar çərçivəli qadağa qəbul edilmişdi. Börns bu qadağanı genişləndirərək, Çin vətəndaşları ilə hər cür münasibətə tam qadağa qoyub.

Qaydaların sərtləşdirilməsinə səbəb Çin xüsusi xidmət orqanlarının artan fəallığı olub. ABŞ kəşfiyyatına görə, Çin rəsmiləri "bal tələsi" (honey trap) kimi üsullardan istifadə edərək məxfi məlumatlar toplamağa çalışır.

ABŞ diplomatlarına Çində bu cür əməkdaşlığa cəlb etmə cəhdlərinə qarşı xüsusi təlimlər keçirilib.

Dövlət Departamenti daxili göstərişlərlə bağlı şərh verməkdən imtina edib, Milli Təhlükəsizlik Şurası isə sualları Dövlət Departamentinə yönəldib. Çin Xarici İşlər Nazirliyi də yeni qadağa ilə bağlı konkret açıqlama verməyib.

N.Təbrizli