Avropa Komissiyası “TikTok”u bu səbəbdən ittiham edir

Avropa Komissiyası sosial media platforması “TikTok”un Avropa İttifaqının rəqəmsal reklam qaydalarını pozduğunu bəyan edib.Bu barədə xarici KİV-lər xəbər verir.

Komissiyanın açıqlamasında “TikTok”un Aİ qanunvericiliyinin tələblərinə zidd olaraq istifadəçilərə təqdim olunan reklamlarla bağlı şəffaflıq prinsiplərinə əməl etmədiyi bildirilib.

Qeyd olunub ki, şirkət indiyədək reklam elanlarına dair kifayət qədər ətraflı və funksional məlumat bazası təqdim etməyib. Məlumatların məhdudluğu səbəbindən hansı reklamın kim tərəfindən maliyyələşdirildiyi və hansı istifadəçi qruplarının hədəf alındığı qeyri-müəyyən qalır.

Avropa Komissiyası “TikTok”a qarşı ötən il Rumıniyada keçirilən prezident seçkiləri zamanı seçki qanunvericiliyinin pozulması, eləcə də azyaşlıların platformada zorakı və asılılıq yaradan məzmunlardan qorunması ilə bağlı paralel araşdırmalar aparır. Bu ittihamlar təsdiqini taparsa, “TikTok”a qarşı ciddi maliyyə sanksiyaları tətbiq oluna bilər.